الواقع يصدم

زجل


حرت ماعرفت اش نكتب
طويت الورقة وحطيت القلم
حسبت وعيت ما نحسب
هم اليوم على هم البارح تلم
طابت الكبدة وطاب الگلب
والجنوية لحگت فيها العظم
جدب يالي فيه الحال وندب
الواقع اليوم صعيب يصدم
ول گال الواقع ساهل يجرب
ولا يلوم الناس الا ندم
شحال من فارس اتغلب
مانفعو بارود ولا عود ادهم
شي كيشرق وشي كيغرب
كلشي عايق وكلشي يفهم
الغني يكدس المال ويرتب
وزايد مزال يشكي بالعدم
والفقيرعايش حياتو معدب
مالقى مسكين فين يخدم
هز يديه لخالق ويطلب
لامن يحن عليه ويرحم
السياس  ينافق ويكدب
والنفاق ماهو طبع المسلم
والبايع ف الميزان ينهب
يحلف عل الباطل ويقسم
والدري يشتم والديه ويسب
جيل ما يراعي ما يحشم
والنسا حالهم مابقى يعجب
تعرات من الراس لگدم.

عبد الله الهواري
تارودانت
05/05/2018

زجل: النسر

عيش ياالنسر ف قمم الجبال
وتجاور ف السما مع السحابة
انت مولف تطير عكس الريح
ومايخلعوك وحوش الغابة
انت لتختار كبف بغيتي تعيش
مايطنزوا فيك كذابة
متمرد فطبعتك وعنيد
مايكسبوك كسابة
ماتقبل لهم اضحكوا عليك
مايتعجبوا فيك عجابة
مايديروا بيك حلقة
مايلبسوك قشابة
عمرك ماتغريتي بريش
ولكن هي عليك مكتابة
خبرهم كيف انت تعيش
بحوتة فجوف البحر لعابة
وعَجبك تعيش عيشة الغريب
وغربتك بغربتها جدابة
وشوفتك شوفة ثاقبة
ماهي شوفة معمشة بضبابة
وخبرهم بلي غابتك غابة
مايدخلوها حطابة
والعلو لنت فيه تحوم
مايوصلوا ليه نصابة
عايش بالنخوة كتر من القوت
والنخوة صعيبة عذابة
گول لهم بلي انت لتجبرها
تجيك گود ولا تخطيك من ذابا
گول لهم بلي انت مادق البيبان
ل  اكتاروا عليها الطلابة
انت متوكل على داك ليخلي
الارض البور تجيب الصابة
جول فسماك ودور وغني
 وگول والعفو يابابا


عبد الله الهواري
25/04/2018

لالة زينة

لالة زينة وزينها إلالي
طالعة لبرج تشالي
الزين  مقامو عالي
وف سومو غالي
نهديه دواحي ونزيد مالي
ولبغى الدنيا بكر
لا يقعد حتى التالي
والصياد ايده على القرص
تبان الارنب ابالي
وعودي محزم ملجم
وانا مفضي مسالي
مانرتاح حتى نصيب غزالي
وعليه نقطع بحور
جبال وثلث الخالي
ونسهر عليه الليل
ماشي غير ليل اليالي
ولا تلموني ياناس
ولا يهمكم  حالي
لاتحكموا عليا من لباس
ولا يغركم تبدالي
ياك كلها وهبالو
انا هدك هبالي
والحكمة كتخرج
من فم البهالي
حنا كلنا بمغرفة مسگين
الگدرة من عندك
والقفال قفالي
وهدشي عاشوه
ناس الاولين
ماجبتو من خيالي
انا غيرعجبني
 انضمتو كالتالي
بقلم
عبد الله الهواري.

عصفوري

اطلقت عصفوري ووقفت
على الشباك  أودعه
فإنطلق الى الافاق
ان الا فق مااوسعه
هناك من يضن انك
على  الارض  تزاحمه
وانت تعده اخاك
تضن وجودك يسعده
انت تعرف من انت
وكل الانسان ومعدنه
ذهب نفيس ورصاص
على القلب ما أتقله
بياض القلب لا يخفى
أفعال المرء تظهره
ومن تنكر وإستخفى
مرور الوقت يفضحه
يتضاهر أنه قد ينسى
لكنك انت شاغله
يستكتر عليك ان تفعل
امرا هو قد يعجزه
وانت لغيره تحيا
فمطرب الحي لا يطربه
وحتى لغيره وان اطربت
دالك ما لايعجبه
دعه ومافيه من غل
يكفي ان الغل يقطنه
متواضع النفس يرقى
دوما التوضع رافعه
والمتكبر وان استعلى
في الاسفل  موضعه
فسكن الافق ولا تخشى
إن البشر لا يسكنه
بقلم
عبد الله الهواري.

تارودانت

اخبرتك بتاء والتاء
ضاربة ف التاريخ جدور
مدينة قديمة وعريقة
من زمان وعلى مر العصور
عروسة وسط الجبال
ما حديا حدود ولا بحور
عندي خمس بواب
ؤمدورة  بيا سور
اسراگ وتالمقلات ساحات
وفرق الحباب وبرج منصور
معروفة بالعلم والفيقه
ومن عندي كان كيشع النور
وكانت شلا جنانات وسواگي
وشلا رياضات وقصور
وحتى دابا قائمة بداتي
وعندي مكانة وحضور
متميزة بالليمون وارگان
ل متلقها فياي مكان فالمعمور
وعندي تقافتي و فني
وكل حاجة عندي فيها دور
الدقة بنت الاصل والملحون
وتشلحيت ل تسحر الجمهور
والميزان الهواري
ل يخلي السامع مبهور
وناسي ناس طيبين
مافيهم عياقة ولا تكبر
وما عندك  عليا اخبار
يا  لسامع ولاقاري شي سطور
جي لبلادي وقرا تاريخي
على ارضي وجبالي محفور
ؤسول عليا الجامع الكبير واد الوعر
يكشفو ليك المستور
وإلا جيتي طلب التسليم
وقول مسلمين لهد الگور
راني  ولافة بزاف
 ولزارني ومشى
 لبد يرجع إزور.

الشاعر عبد الله الهواري

الساكني

 علاش جيت بغيت نكتب
 صبت القلم ماصبت الدواية
و بغيت نضمد جرحي
ونداويه ماصبت دوايا
نكتم سري نخبه ف بير
نصبو ف فم الدوايا
نعيا نبعد على الضيم
نصيبو لصق حديا
 نبغي نغني نگول الكلمة
 ومانصب لِها عداية
ماعرفت واش مني ولا من
 داك الساكني ل مالك هوايا
درت لك الله يا الساكني گول
علاش زدت ف همي و شقايا
واش ماقدك هد القلب المقهور
واش ماأتر فيك نواحي وبكايا
خليت الغابة وخليت البحور
وسكنت فهد الجسد معيا
لبستيني بحال القشبة وتدور
خلتني للعديان شفايا
 ما ليك دوا مانفع معك بخور
لحقاش أنا هو انت وانت هو أنيا
نهار لنكون فرحان و مسرور
دموعي غادا مالِها نهاية
نهاري ولا عندي ليل وليلي
غابت نجومو من سمايا
عيت نتكلم و نفرز الكلام
لامن يفهمني ويفهم لغايا
لا من يعبرني ويعطني ودن
ويسمع مني الحكايا
دوك ل ِضنتهم يواسيوني
جبرتهم غير حضايا
ياربي راني لك شكيت
وانت الوحيد سامع شكايا
طفي نارهد القلب برحمتك
من غيرها ما تنفع طفاية
واش ل توكل عليك يخيب
لبدا يبلغ المقصود والغاية
بقلم
ع الله الهواري

حٌك الذبرة :زجل مغربي

حٌك الضبرة تبان
خلي الدم يسيح
راها خمجت من زمان
وغلب عليها الگيح
الذيب سارح ف الخرفان
والكلب شبع نبيح
وأنت يابني الانسان
واهلي فين داك الريح
فهواك راك غرقان
مسالي الشطيح والرديح
وشلا منك قومان
عرفت غير السليخ والدبيح
لبسك السرج الشيطان
ركب وتبورد مليح
خلك تايه ف الطرقان
ماعرفتِ لفيهم صحيح
الا انت ضعيف وعيان
بحال المريض طريح
وإلا صحيح ؤشبعان
يولي فيك الشر قبيح
ارحمنا يارحمان
هدينا لصلاة والتسبيح
جود علينا بالغفران
انت راك حنين سميح
انت مالك هد الكوان
المعلقة من غيرك تطيح