العود الادهم زجلية في عشق الخيل

زجل:ميزان المحبة

ميزان المحبة

يا ل باغي يتاجر فالمحبة

يضبط الميزان ويگاد الميل

ويجعل من لسان شهدة

كلامو  بالعسل  يسل

ولا يعتبر راسو معلم

عندو همة  وزن تقيل

ولا يعتير الناس ف ظلمة

وهو الفاهم مول البيل

وما يتغر بضو النهار

من بعدو يجي ظلام الليل

والليلة لغابت فيها الگمرة

ما تكفيها شمعة ولا القنديل

والنوبة الا كانت فيه اليوم

 لغيرو غدا عازمة الرحيل 

ول ما گاد على نار المحبة

ما يتبلى ومايعشق خليل

والدمعة ل ما جات من جوف

ما  تفاجي القلب العليل

والحنة ل ما ضوات گدام

ماهي حنة ما يوتيها  شربيل

ول تبلى بطلوع الجبال

يدير  بحساب  النزيل

والكلام لكتروا فيه المعاني

هداك كلام  قابل  لتأويل

والحق   حق لابد يتقال

ولو يخرج من فم هبيل

وانا  ديرني غير داوي

ماقري والو والفهم قليل

و راني مْسلْم لكل داوي

قُدام  الحرف عبد ذليل

عبد الله الهواري

زجل: موضوع الوقت والبطالة

الساعة

مالكي يالساعة غادة طايرة

وعلاش زربنين دوك السوايع

مال هداك الموري عندك

غير غادي ادور و دايع

مالكي على هد الطبيعة

واش مالقتي غير هي فالطبايع

جيت نحسب عمري بسوايعك

صيبت راسي فايامي ضايع

لبسني الشيب بلا مايخبرني

لقيتو فزغب راسي شايع

وليت غادي من غير هويا

حادرالراس لزمان وطايع

ايامي امرها ماشي بيديا  

مغبون ماشري فيها مابايع

ماكاين غير سلك سلك

مليتها حياة كلها رقايع

الوقت عندي ماهي وقت

الطعم باسل والذوق مايع

نجري باش نوصليك مانفعتني 

لاحرافي لاصنعة من صنايع.

عبدالله الهواري

                                                                                      

زجل خويا المسلم

خويا  راني ضنيت فيك الخير
لا تخيب فيك  شي نهارضني
كون مول الحكمة و القلب الكبير
خليك  فطبعك لاتعود تصدمني
كون بحال الورد يفوح بالعبير
وخلي روايحك بالطيب توصلني
كون فاهم ولا تعطي ودنك لغير
انا مانخسرك وانت ما تخسرني
دير النية وتوكل على الله وسير
تعيش ف الراحة والبال ومهني
وسلم امرك  للخالق  مول التدبير
اقدرك على طاعتو وقدرني
وصوغ كلامك في احسن تعبير
وبَعَد على الشر وليه غني
راني انا خوك وعليك نغير
 ممكن تتقبل هد النصيحة مني
الاخوة سرها فالنصح والتذكير
والا غلط انا عفاك  ذكرني
هكدا خاصنا نكونوا كبير وصغير

يد فاليد ولضرك حتى انا ضرني
والا كان شي غلط ولا تقصير
انا نعدرك وحتى انت عدرني.


عبد الله الهواري
10/07/2018

الزهر المعاند

زجل

مالك يالزهر معاندني

تجي حتى لبابي وتتلف

عيت نادي عليك اجي

صوتي بحاح وريقي نشف

ديما عاطني بالظهر

وانا مانمل ما نشعف

الزمان كيدردگ عليا

خدام بالگدم يشتف

والخايبة محزمة تشطح

ماكاين غير شتف هيتف

وانا تعودت عليهم

مابقيت نتصدم ولا نسخف

نرقص معهم عل القعدة

نهز المرود ونهز الكتف

وندور مع دواير الزمان

راكب وشاد الصف

الهم ساكن ف الجوف

شاخ فالنفوس وشرف

وشعيرات الراس كملهم

وسارح فاللحية وينتف

وانا والله مامعول عليك

نحلف ونزيد نحلف

الشجرة الا ما تقطعت

ما تكبر مادير الخلف

انت عمرك ما دير زوين

وانا ما ندعي معك الله اخلف

وهدا هو حال المسكين

فهد البلاد الله يلطف

وحالو من سعد المكلفين

والا فهم وتكلم يرعف

عبد الله الهواري

27/06/2018

زجل بحر الغرام

بحر الغرام ياسيادي واعر

شلة ماقالوا فيه الناس

لكل العشاق غالب وقاهر

بحر غارق ماليه قياس

شحال من واحد بايت ساهر

حيران مابغيه نعاس

مضيوم ماعندو خاطر

الليل وماطال عساس

قلبو مسكين لضر صابر

مجروح ومقطع بمواس

سولوا عليه الفارس عنتر

لتعدات شجاعتوالقياس

واش عمرو كان لبحر عابر

انتصر فالحب ورفع الراس

وقيس لكان غايب حاضر

يداوي حر الكية بالكاس

عقلو هجر داتو وسافر

ما صاب من حبو يتساس

الحب صعيب وكافر

من نارو الله احد الباس

بمحاينو وعدابو قادر

تكون سيد ويجعلك خماس

لا انت رابح فيه ولا خاسر

والا خطاه العداب يمساس

عبد الله الهواري

22/05/2018

حديت ومغزل زجل مغربي

حكي لي ياجدي وعود
منها حديت ومغزل
حكي لي على عيشة زمان
راني كنت صغير كنعقل
حكي لي على  داك الفدان
والگمح لكان فيه اهبل
وفرينة الضاربة لحزام
والشعير حدها يسبل
حكي لي على دوك البگرات
وديك الغنم والدجاج والنحل
والحليب لكان غير فايض
وزلايف السمن والعسل
حكي لي على وقت الفياق
مع الفقيه فالفجر يهلل
والوقت لكانت غادية
دقة دقة بالقياس وبالمهل
حكي لي على الجورة لكانت
والبواب مفتوحة  مالها قفل
وديك الگعدة مع الجماعة
وقليل النية يتسل
وحكي لي على دوك المواسم
والتبوريدة بالمكاحل
جوبني علاش الضباب فارق سمانا
والطقس اليوم تبدل
علاش البركة طارت من المسايل
والذوق شيان وتبهدل
فين هي ايامات الحصاد
وعلاش علقنا المنجل
علاش مابقينا نحيحوا جاوش
ولا نحاربوا نمل
فين الحجلة وفين السمانة
والبلارج لجمع قشو ورحل
علاش وادنا نشف من ماه
والدفلة مابقات ديرة الضل

والناعورة وقفات على الدوران
والعين وكحات ومات البغل
مابقات صدقة ولا عشار
لامن يحرم ولا يحلل
 الدنيا غادية زفانة زربانة
وياويلو لما زرب وتعطل
حكي لي نحكي لناس
عسانا نلقاوا حل
ترجع لينا بركة زمان
ولو غير مرة تطل.

عبد الله الهواري
17/06/2018