زجل:زهري

زجل:زهري

گالوا الزهر يتفرق بالكاس

وانا كاسي مالو متقوب گاعو

دخلت نسول فالسوق گاع الناس

گالوا ليا مواليه من مدة باعوا

حطيت على كل طريق عساس

وكريت البراحة فالاسواق داعوا

گالوا هو ورگة من الورد يتساس

وانا وردي سايس الورگ تاعو

گالوا هو فبحر يلزمو غطاس

وانا مركبي راشي مشرگ شراعو

گالو هو كنز واقفين عليه حرا س

وانا قوتي وحيلتي مني ضاعوا

ماحلتي لنفسي ولا للوسواس

زادو القلب ف همو و اوجاعو

واش الصبر بالبحر يتقاس.

انا بحري زادوا شطأنو وساعوا

من زهري راني قاطع الياس

ولفت تحويط الزمان وترقاعو

والنا س حطابة ولسانها فاس

مايگولوا حشومة و ما يراعو

ونفسي عزيزة غالبها الاحساس

وحلفت جوارحي لهواها لاطاعو

مالي انا مع الزهر وصداع الراس

الواحد هو ليتحزم جيبها بدراعو

عبد الله الهواري

21/08/2018

*************  جذبة  ************

زجل

كمل الفيلم طلعت الكتبة

حضر الحق وبانت الكذبة

وتفرز الكلام  حبة حبة

واليوم  بان  العربون

***************

تعزل راس الخيط من الكُبَة

كلشي باين مابقى مايتخبى

تفرشت  وتورقت اللعبة

وتفضح  السر المكنون

***********

الجورة  مابقات بالعتبة

جيران  وكلها في غربة

مابقات خاوة ولا محبة

الحب  بالمال مرهون

************

قلة الحيا صبحت جلبة

تباع فكل سوق ورحبة

والعرا موضة وجذبة

الشباب برياحها مسكون

*************

لباس النسا ضرباتو نكبة

عراوا  مافوق الركبة

الحْمَام  ما بقى يتربى

والنعجة دارت الگرون

***********

فالحركة تشتتات السربة

والفرسان ماتعرف لبوحبة

والخيل  اطلاتها الجربة

والمقدم براسو  مفتون

***********

ماعرفنا منين جات الضربة

بغينا  نعرفوا شكون السََبة

العصيدة بردات ولات صٌوبة

وكلها دار يديه فالسخون

**********

الباطل  بناوا عليه قٌبة

إزوروه الشٌرفة والطٌلبة

قلوبهم شاربة منو شربة

ولگال  الحق  مجنون

**********

فيق   يالنايم  من الگْلبة

لا تغر برفاگة ولاصٌحبة

طريقك طويلة كلها عَگبة

لا تبقى فهد الزمان مغبون.

عبد الله الهواري

12/10/2018 

رسالة من البحر***زجل***

رسالة من البحر

يا المغرب رحم شويا

باولادك  كون  رفيق

لا ترميهم  بيديك  ليا

انا ما نتحمل ولا نطيق

ذنبهم عليك ماشي عليا

واش العاقل فالبحر يثيق

إلا يفضلوا يموتوا فيا

العيشة فيك لا ش تليق

حَسَنْ وگاد لِهم الوضعية

ورحمهم من الشدة والضيق

باركة من الوعود الخاوية

وأراك للصح والتطبيق

ربط الحساب بالمسؤولية

باركة من النهب والسريق

المسؤولين يعبثوا بالميزانية

لا رقابة لا حساب لا تحقيق

الانتخبات والاحزاب مسرحية

دايرنها لفلوس الشعب طريق

قلا ل هما لِعايشين فالرفاهية

والباقي ماصاب يطلع الريق

فين  الكرامة وفين الحرية

ولا غيركلام كدوب وتخربيق

والنتيحة اليوم باينة ها هي

كل نهار مركب فالبحر غريق

عبد الله الهواري

26/09/2018  

الانا //زجل//

الانا

 داء لاتدري النفس انها مصابة به.

سألتك  لله  يالأنا

ب أي حق ساكننا

 وعلاش بالضبط عاجبنا

من غير ريح نافخنا

احنا نمشوا عل الارض

وانت فسماء سارحنا

درناك فوق راسنا تاج  

وانت فالحضيض حاطنا

علاش لبستنا بالمقلوب

وسيطرت على  الگانة

منك ادخلنا الشيطان

وسكن فالجسد معنا

كل واحد بنفسو مفتون

ما كاين غير  انا

ماهو عند الناس محبوب

وما عايش  عيشة مزينة

  ومن عند الكل مكروه 

الشوفة الناقصة والاهانة

والاناني ماهومعزوز

واش جاب النحلة لدبانة 

گولي كيف منك نبراوا

لا فقيه ولا طبيب دوانا

دواك فالتواضع كاين

فالبساطة والمسكنة

وتعويد النفس عل الاثار

 وتقويمها بحق مولانا

الحصول ومسك الختام

اعود بالله من قولة انا.

عبد الله الهوري

زجل عاشق هاوي

                                                                        عاشق هاوي

تبادلت مع الفرشات حديتْ

بغات تعرفني عامر ولا خاوي

گالت ليَ شحال من كتاب قريت

نعرف وزنك وشحال ساوي

وشحال فحقو انتيا جريتْ

ولا غير من الخوا داوي

گلتْ لِها انا ماشي يالله بديتْ

وف الحرف راني عاشق هاوي

بحب الحرف راني انا تبليتْ

ومنو وبيه وفيه كانداوي

ولا تلوميني الا هكدا دويتْ

راني مجدوب الحال وهداوي

من نبع حبو بالعشق تسقيتْ

وشارب منو كيسان قهاوي

مانفارقو ولا نگول مليتْ

وعمرني ما كنت ناوي

گالت ليَ الحرف لمنو شكيتْ

زيد بَخَرْ بِه راه فيه الجاوي

ونِعمَ المرضة ل بها تأديتْ

الجاهل مايتفقه مايكون راوي

بجوابك راك فالصواب جيت

والمتعلم يكون كالبدر ضاوي

ؤكان ما انت بالفعل حبيت

مايكون كلامك مقاد مساوي

عبد الله الهواري

15/07/2018

صَهِيل و بوحِْ

صَهِيل و بوحِْ

تَكَلُّم يَاصهيلْ لقصَايدْ وَبُوح

وإلا بَحْتِ عَاوَد بُوحُ تَانِي

كَلامَك زَيَّن إيرد الرَّوْحَ

وفِيهِ شلَّةَ حكْمَةٍ ومعاني

كَلامَكَ مَسَّكَ بِالطَّيِّبِ إفوح

نَابِعٌ مِنَ إحساس إنساني

كَلَاَمَ بَايِنِ وَاضِحِ مشروح

ونغمتو مِيزَانَهَا غيواني

فَضْفَضَ وَعَبْرٌ بقْلب مَفْتُوح

يَسْمَعك الْمعَذِّب يَرْجِع هَانِي

يَرْمِي هَمْوُ وَرَا ظُهْرُو وَيُلَوِّح

وَالنِّسْيَان نَعَمَة وَسِرّ ربَّانِي

يَسْمَع كَلَاَمَك الْقَلْب الْمَجْرُوح

يَبَرَّا مِنَ الضَّرِّ مَا يَبْقَى إعاني

وَالْعَيْن تَحْبِس ماتبقى تَنُوح

وَتَرْضَى بِحُكْمِ الْوَاحِدِ الْغَنِيِّ

لَا تغر بدُنْيَا يالسَارح رُوحْ

الدّنْيَا مابقى فِيهَا غَيَْر ثَوَانِي

وَكَتَمْ سرك لايصبح مَفْضُوحً

وَتَحَصَّنَ بالقرآن وَالسَّبْع الْمَثَانِيّ

 شَحالْ من وَاحدْ فَالْوَاد مَطْرُوح

وَالْوَاد  كَيَصْبٍ ف بِحرّ فَانِي.

22 / 07 / 2018

عَبْدَ اللهِ الْهَوَّارِيِّ

صهيل القصايد  ديوان مشترك مع زجالين مغاربة

زجل عن الاب مؤتر لكل من يعرف قيمة الاب

العود الادهم زجلية في عشق الخيل

زجل:ميزان المحبة

ميزان المحبة

يا ل باغي يتاجر فالمحبة

يضبط الميزان ويگاد الميل

ويجعل من لسان شهدة

كلامو  بالعسل  يسل

ولا يعتبر راسو معلم

عندو همة  وزن تقيل

ولا يعتير الناس ف ظلمة

وهو الفاهم مول البيل

وما يتغر بضو النهار

من بعدو يجي ظلام الليل

والليلة لغابت فيها الگمرة

ما تكفيها شمعة ولا القنديل

والنوبة الا كانت فيه اليوم

 لغيرو غدا عازمة الرحيل 

ول ما گاد على نار المحبة

ما يتبلى ومايعشق خليل

والدمعة ل ما جات من جوف

ما  تفاجي القلب العليل

والحنة ل ما ضوات گدام

ماهي حنة ما يوتيها  شربيل

ول تبلى بطلوع الجبال

يدير  بحساب  النزيل

والكلام لكتروا فيه المعاني

هداك كلام  قابل  لتأويل

والحق   حق لابد يتقال

ولو يخرج من فم هبيل

وانا  ديرني غير داوي

ماقري والو والفهم قليل

و راني مْسلْم لكل داوي

قُدام  الحرف عبد ذليل

عبد الله الهواري

زجل: موضوع الوقت والبطالة

الساعة

مالكي يالساعة غادة طايرة

وعلاش زربنين دوك السوايع

مال هداك الموري عندك

غير غادي ادور و دايع

مالكي على هد الطبيعة

واش مالقتي غير هي فالطبايع

جيت نحسب عمري بسوايعك

صيبت راسي فايامي ضايع

لبسني الشيب بلا مايخبرني

لقيتو فزغب راسي شايع

وليت غادي من غير هويا

حادرالراس لزمان وطايع

ايامي امرها ماشي بيديا  

مغبون ماشري فيها مابايع

ماكاين غير سلك سلك

مليتها حياة كلها رقايع

الوقت عندي ماهي وقت

الطعم باسل والذوق مايع

نجري باش نوصليك مانفعتني 

لاحرافي لاصنعة من صنايع.

عبدالله الهواري

                                                                                      

زجل خويا المسلم

خويا  راني ضنيت فيك الخير
لا تخيب فيك  شي نهارضني
كون مول الحكمة و القلب الكبير
خليك  فطبعك لاتعود تصدمني
كون بحال الورد يفوح بالعبير
وخلي روايحك بالطيب توصلني
كون فاهم ولا تعطي ودنك لغير
انا مانخسرك وانت ما تخسرني
دير النية وتوكل على الله وسير
تعيش ف الراحة والبال ومهني
وسلم امرك  للخالق  مول التدبير
اقدرك على طاعتو وقدرني
وصوغ كلامك في احسن تعبير
وبَعَد على الشر وليه غني
راني انا خوك وعليك نغير
 ممكن تتقبل هد النصيحة مني
الاخوة سرها فالنصح والتذكير
والا غلط انا عفاك  ذكرني
هكدا خاصنا نكونوا كبير وصغير

يد فاليد ولضرك حتى انا ضرني
والا كان شي غلط ولا تقصير
انا نعدرك وحتى انت عدرني.


عبد الله الهواري
10/07/2018

الزهر المعاند

زجل

مالك يالزهر معاندني

تجي حتى لبابي وتتلف

عيت نادي عليك اجي

صوتي بحاح وريقي نشف

ديما عاطني بالظهر

وانا مانمل ما نشعف

الزمان كيدردگ عليا

خدام بالگدم يشتف

والخايبة محزمة تشطح

ماكاين غير شتف هيتف

وانا تعودت عليهم

مابقيت نتصدم ولا نسخف

نرقص معهم عل القعدة

نهز المرود ونهز الكتف

وندور مع دواير الزمان

راكب وشاد الصف

الهم ساكن ف الجوف

شاخ فالنفوس وشرف

وشعيرات الراس كملهم

وسارح فاللحية وينتف

وانا والله مامعول عليك

نحلف ونزيد نحلف

الشجرة الا ما تقطعت

ما تكبر مادير الخلف

انت عمرك ما دير زوين

وانا ما ندعي معك الله اخلف

وهدا هو حال المسكين

فهد البلاد الله يلطف

وحالو من سعد المكلفين

والا فهم وتكلم يرعف

عبد الله الهواري

27/06/2018

زجل بحر الغرام

بحر الغرام ياسيادي واعر

شلة ماقالوا فيه الناس

لكل العشاق غالب وقاهر

بحر غارق ماليه قياس

شحال من واحد بايت ساهر

حيران مابغيه نعاس

مضيوم ماعندو خاطر

الليل وماطال عساس

قلبو مسكين لضر صابر

مجروح ومقطع بمواس

سولوا عليه الفارس عنتر

لتعدات شجاعتوالقياس

واش عمرو كان لبحر عابر

انتصر فالحب ورفع الراس

وقيس لكان غايب حاضر

يداوي حر الكية بالكاس

عقلو هجر داتو وسافر

ما صاب من حبو يتساس

الحب صعيب وكافر

من نارو الله احد الباس

بمحاينو وعدابو قادر

تكون سيد ويجعلك خماس

لا انت رابح فيه ولا خاسر

والا خطاه العداب يمساس

عبد الله الهواري

22/05/2018

حديت ومغزل زجل مغربي

حكي لي ياجدي وعود
منها حديت ومغزل
حكي لي على عيشة زمان
راني كنت صغير كنعقل
حكي لي على  داك الفدان
والگمح لكان فيه اهبل
وفرينة الضاربة لحزام
والشعير حدها يسبل
حكي لي على دوك البگرات
وديك الغنم والدجاج والنحل
والحليب لكان غير فايض
وزلايف السمن والعسل
حكي لي على وقت الفياق
مع الفقيه فالفجر يهلل
والوقت لكانت غادية
دقة دقة بالقياس وبالمهل
حكي لي على الجورة لكانت
والبواب مفتوحة  مالها قفل
وديك الگعدة مع الجماعة
وقليل النية يتسل
وحكي لي على دوك المواسم
والتبوريدة بالمكاحل
جوبني علاش الضباب فارق سمانا
والطقس اليوم تبدل
علاش البركة طارت من المسايل
والذوق شيان وتبهدل
فين هي ايامات الحصاد
وعلاش علقنا المنجل
علاش مابقينا نحيحوا جاوش
ولا نحاربوا نمل
فين الحجلة وفين السمانة
والبلارج لجمع قشو ورحل
علاش وادنا نشف من ماه
والدفلة مابقات ديرة الضل

والناعورة وقفات على الدوران
والعين وكحات ومات البغل
مابقات صدقة ولا عشار
لامن يحرم ولا يحلل
 الدنيا غادية زفانة زربانة
وياويلو لما زرب وتعطل
حكي لي نحكي لناس
عسانا نلقاوا حل
ترجع لينا بركة زمان
ولو غير مرة تطل.

عبد الله الهواري
17/06/2018
  

زجل: عدي وساعف

جات الفرحة بغات تولد
طرحت مسكينة قبل الولادة
حطت جنابها بغات ترگد
والرگاد ماتجيبو وسادة
صابت الهموم شابعة رگاد
ساكنة ومولفة كيف العادة
هزت شطيطها خرجات
سولتها فين رايحة وفين غادا
قالت لي المكان لفيه المحاين
ماهو ديال جورا وما يتحادا
لله انا بغيت غير نفهم ياناس
والفاهم ليفهم يفهمني ياسادة
انا لكانت فهمتي منها  بحر
اليوم صبت البحر تفادا
واش هي من قلة الحزام
ولا غيرمن قلة العبادة
كاين ل هو والهم توام
من الاول  خلق وزيادة
وكاين ل ديما عارض عليه
معلقو فعنقو كيف الگلادة
لاتشكي محاينك على مهموم
 لايزيدك من الهموم مادا
ولا تعاشرو كتر من 40يوم
لا تعود تشبه ليه و منو تعادا
وانت غير عدي  وساعف
 لتابعو الحساب ما يحس بالسعادة

عبد الله الهواري
03/06/2018

النفس الشاردة زجل

مالك يالنفس الشاردة
شاربة من الهم دخان
گول لي فين انت سارحة
اش من دنيا واش من مكان
الا انت فالجبال خبريني
والا فالوطا اش من فدان
علاش تداري الدمعة بالدمعة
ماصابو ينشفو دوك الجفان
ياك انت غير روح والروح
حرة ماهي مرهونة بأبدان
ركبي الريح وسافري
وطلي طلة على كل البلدان
حلقي وطيري فوق البحور
وتمشاي فجميع الشطأن
علاش ديما غير تخمي
مستسلمة للهم والاحزان
عيشي ايامك وفوجي
وعالجي بنعمة النسيان
حرام تعيشي باكية نايحة
فدنيا فانية ماعندها شان
حتى حاجة فيها ما ديمة
غير الله الواحد المنان
اما انت راكي رايحة رايحة
كيف راحو من قبلك قومان
.
عبد الله الهواري
تارودانت
29/05/2018

الواقع يصدم

زجل


حرت ماعرفت اش نكتب
طويت الورقة وحطيت القلم
حسبت وعيت ما نحسب
هم اليوم على هم البارح تلم
طابت الكبدة وطاب الگلب
والجنوية لحگت فيها العظم
جدب يالي فيه الحال وندب
الواقع اليوم صعيب يصدم
ول گال الواقع ساهل يجرب
ولا يلوم الناس الا ندم
شحال من فارس اتغلب
مانفعو بارود ولا عود ادهم
شي كيشرق وشي كيغرب
كلشي عايق وكلشي يفهم
الغني يكدس المال ويرتب
وزايد مزال يشكي بالعدم
والفقيرعايش حياتو معدب
مالقى مسكين فين يخدم
هز يديه لخالق ويطلب
لامن يحن عليه ويرحم
السياس  ينافق ويكدب
والنفاق ماهو طبع المسلم
والبايع ف الميزان ينهب
يحلف عل الباطل ويقسم
والدري يشتم والديه ويسب
جيل ما يراعي ما يحشم
والنسا حالهم مابقى يعجب
تعرات من الراس لگدم.

عبد الله الهواري
تارودانت
05/05/2018

زجل: النسر

عيش ياالنسر ف قمم الجبال
وتجاور ف السما مع السحابة
انت مولف تطير عكس الريح
ومايخلعوك وحوش الغابة
انت لتختار كبف بغيتي تعيش
مايطنزوا فيك كذابة
متمرد فطبعتك وعنيد
مايكسبوك كسابة
ماتقبل لهم اضحكوا عليك
مايتعجبوا فيك عجابة
مايديروا بيك حلقة
مايلبسوك قشابة
عمرك ماتغريتي بريش
ولكن هي عليك مكتابة
خبرهم كيف انت تعيش
بحوتة فجوف البحر لعابة
وعَجبك تعيش عيشة الغريب
وغربتك بغربتها جدابة
وشوفتك شوفة ثاقبة
ماهي شوفة معمشة بضبابة
وخبرهم بلي غابتك غابة
مايدخلوها حطابة
والعلو لنت فيه تحوم
مايوصلوا ليه نصابة
عايش بالنخوة كتر من القوت
والنخوة صعيبة عذابة
گول لهم بلي انت لتجبرها
تجيك گود ولا تخطيك من ذابا
گول لهم بلي انت مادق البيبان
ل  اكتاروا عليها الطلابة
انت متوكل على داك ليخلي
الارض البور تجيب الصابة
جول فسماك ودور وغني
 وگول والعفو يابابا


عبد الله الهواري
25/04/2018

لالة زينة

لالة زينة وزينها إلالي
طالعة لبرج تشالي
الزين  مقامو عالي
وف سومو غالي
نهديه دواحي ونزيد مالي
ولبغى الدنيا بكر
لا يقعد حتى التالي
والصياد ايده على القرص
تبان الارنب ابالي
وعودي محزم ملجم
وانا مفضي مسالي
مانرتاح حتى نصيب غزالي
وعليه نقطع بحور
جبال وثلث الخالي
ونسهر عليه الليل
ماشي غير ليل اليالي
ولا تلموني ياناس
ولا يهمكم  حالي
لاتحكموا عليا من لباس
ولا يغركم تبدالي
ياك كلها وهبالو
انا هدك هبالي
والحكمة كتخرج
من فم البهالي
حنا كلنا بمغرفة مسگين
الگدرة من عندك
والقفال قفالي
وهدشي عاشوه
ناس الاولين
ماجبتو من خيالي
انا غيرعجبني
 انضمتو كالتالي
بقلم
عبد الله الهواري.

عصفوري

اطلقت عصفوري ووقفت
على الشباك  أودعه
فإنطلق الى الافاق
ان الا فق مااوسعه
هناك من يضن انك
على  الارض  تزاحمه
وانت تعده اخاك
تضن وجودك يسعده
انت تعرف من انت
وكل الانسان ومعدنه
ذهب نفيس ورصاص
على القلب ما أتقله
بياض القلب لا يخفى
أفعال المرء تظهره
ومن تنكر وإستخفى
مرور الوقت يفضحه
يتضاهر أنه قد ينسى
لكنك انت شاغله
يستكتر عليك ان تفعل
امرا هو قد يعجزه
وانت لغيره تحيا
فمطرب الحي لا يطربه
وحتى لغيره وان اطربت
دالك ما لايعجبه
دعه ومافيه من غل
يكفي ان الغل يقطنه
متواضع النفس يرقى
دوما التوضع رافعه
والمتكبر وان استعلى
في الاسفل  موضعه
فسكن الافق ولا تخشى
إن البشر لا يسكنه
بقلم
عبد الله الهواري.

تارودانت

اخبرتك بتاء والتاء
ضاربة ف التاريخ جدور
مدينة قديمة وعريقة
من زمان وعلى مر العصور
عروسة وسط الجبال
ما حديا حدود ولا بحور
عندي خمس بواب
ؤمدورة  بيا سور
اسراگ وتالمقلات ساحات
وفرق الحباب وبرج منصور
معروفة بالعلم والفيقه
ومن عندي كان كيشع النور
وكانت شلا جنانات وسواگي
وشلا رياضات وقصور
وحتى دابا قائمة بداتي
وعندي مكانة وحضور
متميزة بالليمون وارگان
ل متلقها فياي مكان فالمعمور
وعندي تقافتي و فني
وكل حاجة عندي فيها دور
الدقة بنت الاصل والملحون
وتشلحيت ل تسحر الجمهور
والميزان الهواري
ل يخلي السامع مبهور
وناسي ناس طيبين
مافيهم عياقة ولا تكبر
وما عندك  عليا اخبار
يا  لسامع ولاقاري شي سطور
جي لبلادي وقرا تاريخي
على ارضي وجبالي محفور
ؤسول عليا الجامع الكبير واد الوعر
يكشفو ليك المستور
وإلا جيتي طلب التسليم
وقول مسلمين لهد الگور
راني  ولافة بزاف
 ولزارني ومشى
 لبد يرجع إزور.

الشاعر عبد الله الهواري